JANYN O MARDYN-AY HAKK
Shokr ca kāder-ay sad ganjyn darā
Malek al-molk o badeshah-e har do sarā
Har gwarā kashhit niāmat-ay prāhyn pattarā
Resk e bakshit pa mvmen o gabr o kāperā
Dātagi korān-e mobin may paygambarā
Mostafā sar tāj-e rosol mokhtār ol-warā
Kopr-ay tāriki borretant shams-e khawarā
Din monawwar bit hancv ke badr-e anwarā
Rahmat-e rabb ol-ālamin har dam lakk barā
Pa rasulā o āl o as'hāb-e sarwarā
Gođđ-e cy waspān gvsh kanet shayr-ay daptarā
Cammān pa wāst-e ebratā shānet har gwarā
Cāret y nakshyn gombodā bālāy-e sarā
Māh o khorshid o kawkabān gendet zāherā
Sayl kanet y lonjyn zomin-e pahnāwarā
Kvh o sahrā o kuccag o nilgvnyn zerā
Drost dalil ant pa kodrat-e rabb-e akbarā
Halk'i pa hekmat sāzetag jopt o darwarā
Tāyi o tahnāyi watā zybit kāderā
Jahl o borz, āsmān o zomin māda gvn narā
Nyk o bad, mawt o zendagi
gvn hayr sharā
Jannat o dvzah, rvz o shap gvn bahr o barā
Garm o sard, āp o ātesh hoshki o tarā
Mard o jan paywand'i kotag yak bā digarā
Har donān tawk-e dvsti'i dātag ma gwarā
Harkas-ay hakk'i yr kotag domig-ay sarā
Mard-ay hakk bāz ent O. janyn: dilgvsh ent tarā?
Hazratā gwashtag y habar setk o bāwarā
Gar rawā bittyn sojdah bagayr-e dāwarā
Hokm e kot man ke jan bekant sojdah shoharā
Mard agar har waktā bedant hokmy hamsarā
Jan hamā rahbandā berawt by cun o cerā
Jan watā dāem jahl bejant mesl-e nawkarā
Mardā pa ta'zimy becārit cv mehterā
Par hamok kārā jost bekant mardā pysarā
Mard agar nimmvny bekant har đakk o darā
Sharyatā jāez bebit Allāh-ay gwarā
Jan makant nah, ke jannatā rah nyst monkerā
Mard agar rysh o rym bebit pādān tā sarā
Jan becaŧŧiti pa zobān rvcy sad barā
Hakk nah ent mardyn-ay adā angat āherā
Jan watā dāem sāc bekant mard-ay hāterā
Hancv ke ostā zāg e dant biryn hanjarā
Gvn darysān o zargari saht o zywarān
Myntagyn sar bvān bejant meskyn māparā
Camm o del mard-ay porr bebant koll-ay kawtarā
Naps o shaytān'i tā mabārt az rāhā darā
Jan panāhy ca dvzahā mesl-e esparā
Shar besambāl'i esmat-ay pākyn gawharā
Danz o hāk maylit mard-ay washnāmyn besterā
Nāgehān pvlengy kapit mard-ay cāderā
Gvn do sad sābunā narawt dāg'i hejbarā
Y hayālā taw ham bekan dāem ay pesar
By janā hec waktā nabit mardynā zapar
Zendagi rāhy dur saryn por hawp o hatar
Cvn e rawet y rāhā tak o tahnā yak napar
Jan modām mardyn-ay rapik ent dar y sapar
Munes o gamwār o sharik-e ranj o zarar
Wakt o nā waktā mahram-e rāz ent nazd-e gwar
Ju sari sarwy gombod o sabz o sāyawar
Tāsokyn bacc o dohtar ant y drackay samar
Dvstnak ant y shirenyn eshk-ay wall-ay bar
Āp o myn har wakta'i bekan bell'i kant gomar
Sahega'i nend o bv becen pollān az shajar
Taw maborr y drack-ay bazyn shāhān pa tapar
Tonn'et ma tāhāpā gerit rāhā bay gesar
By gwamyn kvhān e kapay andar gaŧŧ o gar
Ā ce mardy ke hancv ke lvgā kayt ca dar
Pād'i gvn pādā mān e kayt zāyān mān kakarr
Nayn hayā bellit pa janā nayn māt o pedar
Tang e kant zālālā pa god o pocc o nvsh o war
Jan agar yak sohny bekant sad zā'i zabarr
Cest ent pa lvg-ay mardomān dāem laŧŧ-ay sar
Kas janā by rahmi najant mesl gaw har
Lāek-e laŧŧ o zā nah ent jāni dor habar
Hazratā gwashtag taw majan zālā by kadar
Lāl-ay jān bakshyn gwar tarā vmān bit agar
Gvn kotām cammān e kanay mahrangā nezar
Sakk kabāhat ent kandag o grywag yakdegar
Bāyad ent mard o jan bebant cv shir o shakar
Hamdel o hamsetk o aziz, jan o jagar
Jan pa galnāzi gar bekant yak dānky habar
Bāyad ent mardyn'i bekant afw o dar gozar
Taw pa yak sohny gayratā zāl-aygā mabar
Mvledy nah ent ke taw bohā zortag pa do zarr
Har janyn jan nah ent gvsh bedār ay nur-e basar
Nazz makan cammān o majā pvđā cv madar
Lāek-e tashrifā nah ent zāl-e hillagar
Jāhel o magrur o del
āzār o bad gohar
Ezzatā mard-aygā nazānt zāl-e por honar
Mard bekant ehsān o hazār nyki gar satar
Mennat o shokr'i ma dapā nyst ent hic bar
Dvst-ay zangā gvn doshmenān jant shummyn bashar
Wāz o pant y zālā e nakant hec paymā asar
Jant modām mard-ay kađđanā wāst-e yak gabarr
Mard agar yak sohny bekant dapa'i cvpit vh pa sar
Mosref o kharraj ca har haywānā batar
By tab o bad ru ent modām mesl-e jānewar
Tāb e dant dymā o yak kashā wānā dant hatar
Har dap-ay sohnā dawr e dant svcant cv sharar
App. zobān-ay drāh e nabit tā yawm ol-hashar
Svj o sar nar shummā nabit hejbar kāregar
Mast o madhvsh o jāhel o gaŧŧ o kvr o karr
Kant hamā kārā konnat ent mardynā magar
Wakt-e mehmānā cest e bit lvgā shvr o shar
Y nah ent lvgy biragā cāty az saqar
Āherā mardā yak balāhy kārit pa sar
Sell o badnām o sherr e kant zār o dar pa dar
Mard agar zānay taw bekan cy naksā hazar
Dymā pa daryāyā beday omrā pad matarr
Shap tap o rvc marky bebāt shālā y janā
Y jany nah ent ke shash saryn lvpy gardena
Lvg-ay moshk ent ke doshmen ent ārt o rvgenā
Hojj e kant haŧŧārā polān cizzā day
manā
Halwatā byār'i mard tarā gindit balkenā
Cyr beday pylk o rvdokā pashk-ay damona
Rvgenā syr syrā bebar ārtā man manā
Svj'i dāt ostā ke tamām mard-ayg ent gonāh
Māl e bit mardā mast e bit cv pācenā
Gvn del-ay shaynān kant deger sawdāy banā
Pysarā zekk prenc'i bekan hāsyn doshmenā
Jan nazānt mard gar padā pvnāyit manā
Jan cv porrāpā tripp ent ma borzyn bahmanā
Nārawā mardā bāt kapit yak sāhty bonā
Pādy ma kvh o jangala ent pādy bandenā
Sar đahvr ent ma mashkat o ayn o bahrenā
Kaŧŧ e kant kārit zāl e rvdynit gvshbonā
Lvg ke hāli bit rawt pamā pyshi mādanā
Mard kojā sabzit jan dagā ent ma bātenā
Dvzah-ay āsā day nejāt mārā rabbanā
Jan nazānt jāhel ke deger rvcy hast e bit
Gođ ca mawtā dar badan sā paywast e bit
Sur-ay āwāzā harkasā wābā bost e bit
Dar kyāmatā mahshar-ay maydān drost e bit
Kadr-e yak mill rvc sar-ay bānā cest e bit
Harkas ca bimmā gār o madhvsh o sost e bit
Mardom-ay hakk-ay bābatā sakk bāwast e bit
Harkas ke rakket jannatā bālā dast e bit
Ā ke đakket ma dvzah-ay tvkā past e bit
Jan nazānt mard-ay hakk manā vdā jost e bit
Y zobān harcant ke edā tyz o cost e bit
Lell e bit cālākyn zobān vdā sost e bit
Hazratā gwashtag ke sabab cār ant dar hayāl
Mard e bandit gvn mahwashā paywand-e wasāl
Yā ke pa māl o yā nasab yā hosn o jamāl
Taw beger dindārā ke bay āzād o washāl
Man gwashon gvn taw tayi agar dilgvsh gvn man ent
Hazrat-ay kawl ent rāst o bar hakk o rvshen ent
Y jehān sāmāny do rvcā kār shar kan
ent
Behteryn sāmān y jehān-ay nykyn jan ent
Jan hamā ent ke gvn wati jvdā hamdel ent
Mard-ay dasturā gvn hamok shawrā shāmel ent
Setr'i bar jāh o din-e eslāmā kāmel ent
Wash tab o shar sohn o habar zānt o ākel ent
Mard-ay mehmānā wakt o nā waktā kābel ent
Suratā māh-ay darwar o āhu cāmel ent
Siratā soltān maz'hab o sangin māwal ent
Gendagā tonnigyn delā mesl-e trvngal ent
Dāemā gvn nāzyn kandagān shādān o gal ent
Hālekā gwashtag ke janyn jān-ay gandal ent
Tapt o garmāni sāheg o sārtyn manzel ent
Zānon ke maksud o morād mard-ay hāsel ent
Koll gol-ay bāgy golbadan y bāgay gol
Bān satar sharr ent bānok'i mān nyst bātel ent
Vh-e ā jan ke dāemā ŧagg o gvcal ent
Mard-ay nāparmān o sharyat-ay rāhā jāhel ent
Yak jehāny ca pekr pardāyā gāpel ent
Dozz o drvgband o hillah o jaŧŧ o pāgal ent
Dāemā cv jylmārā goshay pyc o mangal ent
Kār'i gvn jvdā dāemā makr o pandal ent
Gendokān drekk o nend o pādāyā trappal ent
Zend-ay gwāzynag gvn coshyn zālā moshkel ent
Mard bezān donyā-ay tahā āsā dākhel ent
Zitt berawt daryāyā cyā moptā mahtal ent
Jan hamā sharr ent , mard-ay parmānā kār e kant
Jvdā pa tashrif o tarahhom timār e kant
Ezzat o ekrām o adab sakk bessyār e kant
Mardyn ke hazer nah ent , watā parda dār e kant
Māl-ay pānka'i jant manzela'i cār o wār e kant
Dohtar o baccān'i modām maŧŧ o mār e kant
Mard-ay yādā pa nyknāmi tekrār e kant
Mardyn ke lvgā kayt janyn pyshcār e kant
Kandagy jant o par galy gir o dār e kant
Pahk'i kant hydān , par kehyby sāsār e kant
Har gam o shakky ca delā shvdit gār e kant
Zahmat o taklipān watigān angār e kant
Mard-ay gamnākyn hāterā cv golzār e kant
Mard agar sohny kant , janyn'i vpār e kant
Mard agar harcand rad bebit , āher sār e kant
Lālā pa jān o del wati byl o yār e kant
Mallagi đillā pa janynā sarbār kant
Mard-ay grān wābyn tālehā jan bidār e kant
Borz'i lykit o ezzat o ābrudār e kant
Gar satar nābudy bebit bvra'i swār e kant
Har kadar mard lāek o kābeldār e bit
Ākel o hoshhyār hamok kārā swār e bit
Bastagyn rājāni kamāsh o sardār e bit
Māl o donyā o dawlat'i ham bessyār e bit
By janā zānon ke kapit o bykār e bit
Sāhebi akl'i ca sarā rawt o gār e bit
Del paryshān o by wat o nāhanjār e bit
Dozz o shabdast o lanđar o bad kerdār e bit
Shummyn shaytān-ay sangat o byl o yār e bit
Cv bozā bvshār o harā zyr e bār e bit
Syr lāp hec waktā nabit , syr kār e bit
Gar satar māldāry bebit , wār o zār e bit
Soht-e yak hoshkyn lokmahy dar bāzār e bit
Wakt-e mehmānā shohrat o sharmsār e bit
Sell o mordār o bazzag o by palgār e bit
Ca wati omr o zendagiā byzār e bit
Gapcaly āher ke kapit o gomsār e bit
Ākebat jāh'i dvzah-ay garmyn nār e bit
Mard agar by soddy janyn balkyn sār e bit
Kahemyn bandgāhy agar mardyn hār e bit
Lāekyn zāl-ay mard modām nykukār e bit
Par wati jāhā hākem o kol mokhtār e bit
Nām e kashhit o har kojā ezzatdār e bit
Gvn wati lvgā hamtab o by āzār e bit
Shām o nāhār almodāmā albār e bit
Gvri o sini gvn celimā sarkār e bit
Pocc o pvshāk'i ham tamizz o palgār e bit
Lajj'i bar jāh o mir mađā mangehdār e bit
Koll gvn ā koll-ay bānokā zinnat dār e bit
Par wati jvdā mehrabān o gamwār e bit
Grān o sangin o yak tab o bāz vpār e bit
Gar rady zirit zit padā tvrahbār e bit
Dast'i ma jvd-ay gardenā zarryn hār e bit
Washh e kant jvdā o basy mennatwār e bit
Jan hamā ent ke mard-ay lvgā ābād e kant
Ogdaha'i zirit o gamān'i āzād e kant
Ā jany nah ent ke dāemā petnah pād e kant
Wash nayātkāni majlesā nesht o nyād e kant
Jahl e jant jvdā o watā doshmen shād e kant
Dym-e diwānā pa badi mardā yād e kant
Omr-ay ehsānā yak damānā gār e kant
Har kojā nyshān sakk e kant mardā kād e kant
Lvŧit ke mardā cv harā lvp o sād e kant
Gvn shat o sajjān gvk-ay payma'i pvsād e kant
Y habar mard-ay konnatā ganter zyād e kant
Mardyn pa y rangyn janā cvn hymāt e kant
Yā ke cv dvstā ma dela'i jāgah dāt e kant
Mard e jant gappy halwatā jan salwāt e kant
Kammokā kvsiccyn sarag zāl-ay gwāt e kant
Gardenā kashhit o dapā mesl-e cāt e kant
Lallahyn jvdā biragā sond o pāt e kant
Cokkān cv dyhā mard-ay zeddā shahmāt e kant
Lvg-ay asrārān har kojā tāt o wāt e kant
Y habar shummā par wat o jvdā shāt e kant
Bādeshah mardyn ent , janyn mesl rayiat ent
Har kasā kāry ma sarā parz o sonnat ent
Shāh agar adl o mehrabān wāst-e mellat ent
Rayiat ārām o tābe-e amr-e dawlat ent
Keshwar ābād o harkas āzād o rāhat ent
Mard agar adl o jan wati kārān mojjat ent
Dāemā ā lvg-ay tahā hayr o barkat ent
Lvg agar kāshyn kođđely, mesl jannat ent
Sham agar hoshk ent , ma dapā shahd o sharbat ent
Jan bepahmit ke mard mani cokkāni pet ent
Par mani wāstā rvc o shap andar zahmat ent
Mard agar ezzat dār e bit jan pa ezzat ent
Māl o cizz mard-ay gvn janā by mennat ent
Jan makant kāry , zānt ke mardynā konnat ent
Zāl-ay har kārā behteryn; mard-ay hezmat ent
Ap dayag mard-ay behter az naplyn tāat ent
Jan ke gvn jvdā zahr e bit āyiā lānat ent
Mard agar zolm ent , lāek-e tokk o neprat ent
Mard becārit ke jan mani jend-ay gayrat ent
Dāyi cokkāni ; padā lvg-ay kolpat ent
Dubi poccāni ; golyn koll-ay zinat ent
Zāl-ay hakk bāz ent az kalām-ol-llah sābet ent
Mard agar immān hast tarā delgvshā bedār
Hakk-ay peygama gvsh kan
o shakkā hec mayār
Jan bezān bandig ent ; wata'i nyst ent ehtyār
Hanni ma tayi dasta ent janyn-ay wāg o mohār
Lāgaryn vlākā malađđ gyshyn bvj o bār
Taw makan ruā pa janynā tropsh o tahār
Tang o taklip'i hec makan dar layl o nehār
Par war o nvsh o pocc o pvshāk o kār o bār
Kodrat et hast ent taw makashh sahti mesl-e wār
Māt o pet mardyn o janyn-ay hast ant car
Syād o sāngband-ay kađđan o bandā sakk bedār
Nyst ent by bandyn mardomā molkā ehtebār
Bit neshān rājāni tahā cār mvŧyn sagār
Jan bebant do har donān yak cammā becār
Par god o nān o manzel o bāzi o kenār
Cv makan tayi dymā bebant byzār o shezār
Cammyā por wād e kanay ; cammy sorma dār
Yak jany shādān o gal ent ; yakky wār o zār
Yakky cv sad bargyn golā ; yakky cv palār
Yak dapy sharbat nvsh e kant ; yakky zahr-e mār
Hazratā gwashtag har kodām mard-e nābakār
Lyŧ e kant yak dymā ; bekant zolmā āshekār
Biragā kapp'i hoshk e bit dar rvz-e shomār
Zālemyn mardom bit kojā āsā rastegār
Lvp e bit zāl-ay bydaryn hakkān behtebār*
Mard hamā dehkān ent ; janyn mānand-e keshār
By gomān dehkān'i bekant dāem cār o wār
Ju o bandgāh o pall o parcynk o gir o dār
Zānon ke hec dard e nawārt waylkanđyn đagār
Jan omydāni golshan ent sabz o malgozār
Lāek-e sayl ent rang o bvāni naw bohār
Rostag ma cār koll-ay tahā sarw-e juybār
Sāheg'i washh o shirin o khoshgawār
Māl o cokkāni pānku o lvg-ay zemmawār
Par wati bālādā pa har dasturā tayār
Mard tamām rvcā tā shapā dārit kasb o kār
Zāl o zahgāni hāterā zhand o del fagār
Kayt wati lvgā khasta o ranjur o nazār
Zālā ke gvshān e kapit pā bramsh o tawār
Costā ca jāhā cest e bit mahrangyn negār
Dar e kapit kollā dazgohārāni cam khomār
Krām kanānā cv ŧiŧŧalyn āhug-e
tatār
Dastān ma mard-ay gardenā gyjit mesl-e hār
Bārt'i ma lvgā o kasha'i nendit gamgosār
Par adab āp o tām'i kant gvn gapp o gozār
Mard-ay por gardyn del, gerit ārām o karār
Camm'i bant gvn lāl-ay kajyn borwānān docār
Kāgadyn dym'i bark e jant gvn naksh o negār
Lođđit gvn pollyn kandagān kabg-e kvhsār
Gār e bant rvc-ay zahmat o taklip o peshār
Ma dapā nvsh-e jān e bit tāmdāryn dapār
Wapsit gvn shādānyn dely by gard o gobār
Bass ent Abdollāh panjag-ay kelkārā bedār
Par gwashag hec waktā nakant nādān hvsh o sār
Kas wati wāstā e nazānt taksir o mayār
Har mosolmānā shar bekant shāhyn kerdegār
