balvciay sadahyn tawarynvk( mosawwet)hasht (8) ant:

اوُu يi آ a اُ o اِe اَa

یy  وv

a= ا، آ cv ke:  asآس ,apآپ ,artآرت ,askآسك ,pashk پاشك

a=َ   cv ke: arsاَرس ,aspاَسپ ,mashkمَشك ,pashkپَشك

e: ِ   cv ke: eshkاِشك ,mehrمِهر ,delدِل ,setkسِتك

i:ي  cv ke: sirسير ,mirمير ,dirدير ,pishhپيشّ ,mid

o:ُ   cv ke: ordاُرد , morgمُرگ ,moshkمُشك ,porپُر ,mohrمُهر

u:و cv ki: budبود ,surسور  ، hurحور

balvciay hawaryn tawarynvk 2 ant, ke esh ant:

ay: اَی ، َ ی ، َیـ  cv ke: ayshعَيش,aybعَيب,laybلَيب ,saydسَيد

aw:اَو ، َ و cv ke: kawshكَوش,sawtصَوت ,hawrهَور ,shawkشَوك

GVN ƏLLAH-ƏY PAKYN NAMA

TƏWHID

Haleke aləm pak ent cə məŧ o dərwəra

Y həbər həkk ent gvş kənet setk o bawəra

Zərrə zərrə mən aləma kolle kaenat

yad e kənt hər yəkky pə yəktai dawəra

Hər kəs e zant ke hod pə hod hec cizz e nəbit

Nəkş by nəkkaşa kəya dittəg zahera

Təw kədi monker svhəwyn ostad-əy məbi

Cəmme wət gendəy moştəg o zagyn hənjəra

Kalia gendəy gvn əjəb nəkş o surəta

By goman təswir e nəbit by surətgəra

Pədger cə gamgyj o pəda mərda drost e kənt

Həm pəda carit o dər e gyjit hoştera

Heşty bəgəyr əz kaleba wət jvq e nəbit

Dəste məymar ent cest e kənt borzyn gwatgera

Gol gwəra gyjet kimməti səht o zywəran

Əlləma nəkkaşi kotəg kelke zərgəra

Keştia gendəy gvn zer-əy məwjan ləyb e kənt

Dəste məllahan jəlletəg johlankyn zera

Maşin ke kvh o dərrəhan jəst o hyz e kənt

Tormoz o pərman daştəgənt qəqqyn şupera

Bwan ketaba o kateba şabaşy bekən

Monşia mənnvgər bebəy wanəy dəptəra

Səyl bekən dəhr-əy nəkşəha ba cəşme kherəd

Halek-əy təwhid-əy neşan yr ənt hər gwəra

Həncv dollaba dəwr e jənt kəsre kəhkəşan

Rvc o şəp dər e kənt əlmodam gəşt o cəkkəra

Şəmse khawər ke hər səbah molkan səyl e kənt

Nur o gərmi dənt aləm-əy sartyn səngəra

Sər zəmina ke rəhməte baran səbz e kənt

Bya becar ahi soprəh o pollyn pəttəra                     

Wəq wəqyn nibəg gvn həzar tam o rəg o bu

Təi del-əy hobb o wahəga warynit təra

Ap həmy yəkk ent bəzzəgyn haki nvş e kənt

Rəng o bu yək nəyn hər gol-əy gənjyn kəhcəra

Nəw nehalan ke pəsle paizi loht e kənt

Wəkt e gwazynənt brəhnəga mesle bəzgəra

Haligyn dəstan e bərənt borza gvn kərim

Penqəg e lvŧənt halek-əy səd gənjyn dəra

Kəyt pə dəsture maleka səd gənjyn bəhar

Gol pəda pvşənt parigyn pəşk o cadəra

Əbre nəysan ke hər gwəra banjig bəhr e kənt

Sər pəcyn səhra o təyab lonjyn bəndəra

Trəmpy ke cekkit dər sədəp gəwhər jvq e bit

Dəste dana ent dər sədəp sazit gəwhəra

Kətrəhe apy ke jehit əz poşte pedər

Bər kərar aram e gerit bətne Madəra

Hvn e bit rənda gvşt e bit sah'i man e bit

Goqqe car maha hekməte rəbbe əkbəra

Dəst o pad əngoşt o zoban cəşm o gvş o del

By dəp o swala datəgənt bəndə pərwəra

Grywəga ləggit mati pestana dənt dəpa

Saneha svj datəg mecəg şir-əy pysəra

Hec`i gvn nyst ent kəyt cəra duryn mənzelan

Paşopad kəyt sərdər o loht o jandəra

Rəbb`i rvdynit resk`i dənt əkl o hvş`i dənt

Şah`i kənt molk-əy yr`i kənt taja bər səra

Gəqqəga rvdynit hoda nəkhly jwan e bit

Gvn bər o konŧ o konŧəg o loŧŧ o kvkora

Adəmi yəkk ent şekl o awaz`i yək nəhent

Məc həmy yəkk ent gvn həzar kesmyn sərbəra

Bya rəwanbod ke kodrət-əy karpəd zaher ənt

Cəmm o del kvr ənt əkl o mət nyst ent monkera

Wəssəra cvn cvn jvq e bənt y nəkş o negar

Kodrət-əy dəst ent kar e kənt cyr o əndəra

Kol həmy yəkkyn saneh-əy dəskar ənt wəti

Nyst eda kar o ehtiar dəst-e digəra

Cvn do del yəjjah  pəym e bit yəkkyn sinəha

Sah do ənt cvn cvn e ŧəhənt yəkkyn pəykəra

Molk-əy sərdara hərkoja gend-əy yək kəsy

Dvd nəhent donya-əy do şəh yəkkyn keşwəra

Do bebənt şah a molk e bit by nəzm o hərab

Zal e bit həyran gvn do zvrakyn şohəra

Halek o malek do bebitynənt aləm-əy

Cv pə gwəm rəptar e nəkot dəhr-əy jəntera

Wəşrəwyn gərdun-əy rəwaj y daba nəbit

Pər kehyb jəlwan e nədat şəmse hawəra

Nəzm o tərtib-əy mohkəmyn reştəg sestəgət

Proştəgət kanune bəka by cun o cera

Kəptəgət rad cə gorrəg o bərk əz kəndəga

Gvn həzar cəmma e nəgryt syahyn jəmbəra

Kahi taky mən kucəg o kohsaran nərost

Cəmmoky məy wasta e nəjət lalyn dohtəra

Maha pə beckəndəg şəp-əy cader sər nəjət

Cyr e dat pyşanig wəti bədre ənwəra

Lonje dərya-əy bonzehyn cəmməg hoşk e bit

Gəp gvn a estinna nəjat borzyn ŧihora

Yəkdəm cə kara kəptəgət mizan-əy hesab

Bənd e bit gərdeş mah o salani yəkbəra

Rvca  pə  rahani  səra  kapur e   nəretk

Syəh şəpa ənkas e nəjət meskyn mapəra

Məlləgyn kəwş mən killəgan səylig e nəyatk

Kəwrdəpan pərgvl e nədat kəhryn sərsəra

Bolbola alhan o gola gəlnazi nəkot

Komria golbang e nəjət səwlani səra

Sombola syah o qəkkomyn məlgvr e nərəst

Nərgesa şəppasi nəjət bag-əy hatera

Molk-əy kəwwasan wəşdelyn diwwan e nəkot

Pər redan dor gali nəkot kanyn şahera

Haka gvn ab o ateşa pəywənd e nəbit

Hətm e bit donya o nəmənt cizzy ahera

y jehan nyst-əy pərdəg-əy poşta rəptəgət

Bəlkyn cə nysta e nəbit pydag bondəra

Nəzm o tərtib y jehan-əy rastyn şahedy

Haleke aləm pak ent cə məŧŧ o dərwəra

Nəkşy ke Əbdollah jənt poşte kagəda

Wət gəwah ent ke dər cetəg nokke parkera

MƏKKORAN

Wəşşyn wətən məy məkkoran

Daem bebatəy kameran

abad o səbz o məyzəran

Hər wəkt ke təi nama geran

Təi bv cv meska bit zəran

Təi deljəmyn gəŧŧ o gəran

Syəh-bənd o borzyn ŧihoran

Gəpp e jənənt gvn jəmbəran

Təi sər-şəm o drəng o dəran

Derr o səyādi səngəran

Təi kəlləg o təi apsəran

Səbzyn gwənek gvn zamoran

Hoşbuter ənt əc zaperan

Kvleg gvn şir kombyn təqan

Kəwr dəp gvn daz o killəqan

Təi kucəg o təi kəhcəran

Danick o şemş o kəlpəran

aşkanmoşir o pəmpəran

Grəncen pəc ent cv ŧəpporan

qvlok gvn zəhm o espəran

Səwlyn kəhir gvn şəngəran

Jogr o kəlyr kvnəran

şirenter ənt əz şəkkəran

Killəg gvn nillyn həybəran

Gwaş o gəyabyn kəwr səran

Wəll gvn şəkər tamyn bəran

Pərmaş o maş gvn bajəran

Cyŧənt o saŧənt lagəran

Gvrom gvn bəgg o bahəran

Jvhan gvn wənq o bvhəran

Mərran e səŧŧənt bykəran

Dad o səkhawət gostəran

Ləhq bəkş o Hatəm dərwəran

Bəhr e kənənt gwap o gwəran

Əid ent pə brehk o bydəran

Jvpag poly by bondəran

Brenj rvn morady şamgeran

Neştəg dəni cv gəwnəran

Dəstur e dat pə cakəran

Kəşşənt pə sər bare geran

Gramani cyra təttəran

Penqvk mən gwapan peşkeran

Hvş e cenənt kerr o gwəran

Kəŧŧ e kənənt cv tajeran

Kəndənt gvn zalan əndəran

Lap-əy dər en jət embəran

Məc gvn gərəkk o kvkoran

Ger-gwəng gvn granyn sərbəran

Dripanc o nərmyn simmoran

Rvkyn gezag cv həngəran

Hamyn gvn pollyn pəttəran

Banjigi bəhr ent bəzgəran

Ensan o morg o rəstəran

Gənjy pə war o ləngəran

Kaeynt o nendənt şəhr gwəran

Bəndənt bəronk o kapəran

Lonjyn şəgəz gvn qəngəran

Sond gwap gvn jak o jəlləran

Romb o əwack o əlgəran

Gəpp o gehyn hoş məhzəran

Təi svhəwyn sənətgəran

Sini şəlit gvn sasəran

Kəppu gvn gerdyn cəppəran

Dehkan gvn tvra şik wəran

Borzyn gəqylani səran

Gwərşan cv şynki ŧokkoran

ywənd cv mara şyp geran

Diwan kotəg azawəran

Pvn-cen cv mvra sorsoran

Gvn pat o kəpat o komboran

Lvqi gvn ŧih o ŧəmbəran

Mvled gvn nazynk o soran

ŧimbok gvn qohl o qokkoran

Naci gvn səwt o zymoran

şadeh kotəg rvşawəran

Təi lonjyn təyab o bəndəran

Bvjig gvn lvhyn nəngəran

Nəwl e  kənənt pasinjəran

Məcu gvn a mahi-geran

Kayәnt cə nilgvnyn zeran

Gvn sarm o təgelm o lujjəran

Kaşok gvn wəşşyn kvlgeran

Gvr gvn məzən kalkyn keran

Delsvk e bənt horma horan

Təi zyd o cəragyn svldəran

Bəgg o nələqqyn hoşteran

Bərri kələm gvşyn həran

Əsp o həzari  grohbəran 

Bozgəl gvn myş o myhəqan 

məhri gvn poll o pakoqan

 lyqəw gvn pilli bahoqan        

qaci gvn by gwəmsyn jəqan

kaeynt cə jida zənzəran

Porrap gvn ŧab o ŧahoran

Gamyş gvn dyhi qəqqəran

Sanq cv həma janawəran

nahənjomyn karigəran

Gvn ənt şərik o nəwkəran

Jak  ent modam təi jomboran

təi sər boləndyn mehteran     

raji  kəmaşyn sərwəran   

gərden kəşyn namawəran

Saheb delyn din pərwəran

şyr hemmətyn soltan pəran

Təi manməyatkyn kongoran

Jəngvl o sər komsyn nəran

 nəw jwan gvn şyri ŧyŧeran

Branz e  grənt cv eşkəran

Poşta nəkenzənt ŧəkkəran

Təi mehrəbanyn madəran

şir e dəyynt şyr golloqan

Bəlkyn kəpənt rvcy gəqan

Bəkşənt səra pə bradəran

Təi məhlekayn dohtəran

ahu rəwajyn drəm-gwəran

Pak ənt cv api gəwhəran

Cyr ənt ze cəşme əkhtəran

Təi gol kəndəgyn məhpəykəran

Ləjjani nazyn kəwtəran

Wəş camelyn mənjəw səran

Gvn pəşk o sərig o caderan

Səngəw gvn zərryn zywəran

Bikkan e drənzənt əntəran

Mesk o zəbad o əmbəran

Əhd eş kotəg gvn şvhəran

Mvr eş nəqokit mapəran

Əy məkkoran əy MƏKKORAN

Daem pə təi əhdan zəran

Təi məŧŧ nə ent mazəndəran

Təi wəspa kənan ta dəm bəran

Hejbər məbatəy limmoran

Donya-əy kəhryn sərsəran

Gərdun-əy gəşt o  cəkkərān

Mohtaj məbatəy hejbəran

Cəmdar pə dəst digəran

Svc behtebaryn monkeran

Gəddar o şummyn naşəran

həmrah məbəy nadelseran

Dozz o əqvj o lənqəran

şəytan-əy byl o yawəran

By madər o by wahəran

Loc o ləwəng o lvpəran

By zanəgyn nabawəran

şypənt təi nama mən poran

Təi sahebi gəp o teran

Nəkş ənt mə kwəhnyn dəptəran

Gvn ənt gwəşvkyn şaheran

şeng ənt mən konq o keşwəran

Ji məy wəti molke kohən

Miryn bəlvcani  wətən

Rəşke yəmən dage khotən

Dvstəy bəsy nəzdike mən

Həncv ke sa əndər bədən

Pər məy dela mesle cəmən

Təi qvk o qəl dorre ədən

Zirrok cv şahe nəstərən

Bya təw bekən gvn ma sokhən

a gwəstəgyn gəppan bejən

Del cv zera şod məwj zən

Təi parigyn wərna kojənt

Dərya del o ləşkər şekən

Kvhi poləng o kərgədən

şahin o tajdaryn hodən

Əz gərdeşe dəhre do rəng

şot əz  jehana nam o nəng

donya moj o tarik o təng

zortəg bədan rəsme pərəng

sər brəhnəga tərrənt mələng

by rişş o sər ŧapyn ləwəng

prvştəg bədan şyrani nəng

kəptənt cə şagan nər poləng

dəmmal e kənt rvbahe ləng

mortənt mən dəryaya nəhəng

krakit pogol bər kəste jəng

retkənt cə banza bal o cəng

jvş e jənənt kangoşk o kəng

donya pəryba pvşetəg

mehr o wəpa mərdan şotəg

ləjj o həyaya bal kotəg

wət syadi-əy kərna jətəg

reştəg cə borza coŧŧetəg

donya-əy nəwbət koŧŧetəg

baryn bəlvc cv peŧŧetəg

həyran o hoşk ent gəŧŧetəg

pəşt kenzəkai həŧŧetəg

pətkynke kəwmi cəŧŧetəg

həyp ent ke şot name neku

nəng o məqa o aberu

nazyn golani rəng o bu

tənk ent pə dəwra ləjj-əy ju

jotk e jənənt şummyn kəsu

cəşme wəpa əz wəy məju

donya şotəg bud o rəja

geptəg jehan dənz o moja

miryn bəlvc bittənt koja

bahvŧ-əy serr bittəg pə jah

gwah ent əgət bagaq-əy jah

mortəg bəlvc nəng o ləja

sengyn dela mary dəjat

nalaekyn gərden kəja

nysti dela həwp o rəja

mali zoban ent gəjgəja

ryş ent cv laga sər bəja

hər ja cv zimma jənt teja

mortənt məyar jəllyn moluk

rajani trantvsyn sərvk

rəptənt bezyre hak o qvk

mənt ənt nəzantkaryn gənvk

yretkə cəmmyn kasəlvk

pər mal o donyaya hodvk

ŧəgg o dəga baz o polvk

gəssvk o derrvk o wərvk

həmsaheg-əy tam-əy bərvk

cv pacena məst o jənvk

lap-əy golam ənt mesle gvk

donya cv estinna şəlvk

jənt o gwəzit mesle gervk

rəh təi səqəkk ent mesle jvk

zit kən wəta bənda bemvk

ront o moşit tohm-əy keşvk

donya pəryb o lab e kənt

hər rvc pə rəngy dab e kənt

lonŧan rəjit ənnab e kənt

zolpan pə grehn o tab e kənt

məkr o honər hər bab e kənt

hilləh pə şəyh o şab e kənt

zəhran cv mesle ab e kənt

şypit şərabe nab e kənt

mərda pə məntər wab e kənt

lonj-əy təhəi gərkab e kənt

donya məkame ebrət ent

y zendəgi pə nəwbət ent

mərdom eda dər gorbət ent

əsli wətən məy jənnət ent

por əz həzaran nyamət ent

negbəht həmvda rahat ent

daem pə əyş o eşrət ent

jənnət sərasər rəhmət ent

pərwərdegar-əy dawət ent

nur o sorur o porhət ent

hurani gəpp o həlwət ent

kəsr o kəlat o dəwlət ent

şəhju o bag o melkət ent

pakyn şərab o şərbət ent

jwanyn lebas o zinət ent

rəbbe jəlil-əy royət ent

bylan bələy ke lezzət ent

hərkət kənet ke bərkət ent

kvşeş şomara gvn wət ent

hənni şomara porsət ent

tohmkar-əy şərryn moddət ent

jənnət əgər pə kimmət ent

pərwərdegar-əy mennət ent

majeb pə kar o hezmət ent

nyki bəheşt-əy kimmət ent

kor,an hoda-əy hojjət ent

a ke nomaza mojjət ent

pabənde rahe şəreyt ent

pərmanbəre mat o pet ent

məşgule pərz o sonnət ent

həyrat o zekr o ta,ət ent

kar şər kən o nyk niyət ent

vda pə ezz o hormət ent

Ymen cə mərg o mehnət ent

imman-əy şahy gəyrət ent

By gəyrəta səd lanət ent

Daem gvn brata konnət ent

Kari pəsad o şeddət ent

Drvg o pəryb o tohmət ent

Sitt o reba o reşwət ent

Məst əz şərabe şəhwət ent

Kəptəg mən wabe gəplət ent

Şəytan-əy hasyn səngət ent

By məzhəb o bəd adət ent

Ai mesal cv dəlwət ent

Rəbb-əy gwəra by ezzət ent

Həncv həra dər zellət ent

Roswa o şerr o şohrət ent

Əndər əzab o zəhmət ent

Mərdan şomara mohlət ent

Hemmət kənet ke əngət ent

Hər kar pə bud o hemmət ent

Təhna hoda by hajət ent

Bəkşəndəh o ba kodrət ent

Jami məkən gopt o gozar

By kəqqənyn bvra bedar

Gran kimmətyn galan məgwar

Şot əz jehana ehtebar

Ləbz o dəp-əy kəwl o kərar

Eslam-əy kanun o şoar

Həmsaheg-əy bənd o məyar

By hasel ent dəhr-əy keşar

Kəşşit diar svcyn lowar

Limmortəgənt bag o bəhar

Svtkənt gonahan drəck o dar

Wəyranəh ənt molk o diar

Donya cə zolma bit təhar

Dənz o moj o gərd o gobar

Nvkyn əlamət aşekar

Biganəh ənt tru o neşar

Həmşirəhyn brat o gohar

Cok cə pet o mata pərar

Mərd əz jəna bittəg şezar

Zala e pəyt mərda məcar

Wares pə dawaya təyar

Sangbənd pə dira zəng o zar

Jahel cə dina bər kenar

Şəytan-əy porga bit səwar

Hər cy kənəy gwank o təwar

Cəkk e nəjənt a nabəkar

Donya nə vştit yək kərar

Manit həkaeyt yadegar

WAB O HƏYAL

yək şəpy cəndy həmhəyalyn yar

Həmdel o həmsetk o sokhən singar

Del por əz mehr o kəwmi həmdərdi

Atkənt pə kəste gendok o didar

Wəkty ke dəwre həmdegər neşten

Gellə eş y rənga kotəg ezhar

Təw nəgedəy ke şəp şotəg syahyn

Şengetəg bam o təw nəbəy bidar

Məy gələg dyryn moddəty wəptəg

Bittəg cə bazyn wəpsəgan byzar

Dən jərəs awaz e nəkənt kvc-əy

Məhri mən raha e nəbənt kəttar

Kapelə cvn cvn e kəpit keşka

Sər məkəşşet dən kapelə salar

By şopanka ke rəwt rəməg qənna

Təw bezan wət ke svb e kənt həptar

Mara həm həkky həst həmy molk

Hec kəs məy həkka e nəkənt enkar

Hək nəhent cizy ke rəset mopta

Baeyd ent həkka pəd bejənt həkdar

Məy bəlvcestan jozwə yran ent

Pərcia kəptəg war o by gəmwar

A ke gəmwar ənt dəsteş kvtah ent

A ke sərdəst ənt haen o gəddar

Məy jəwan jəŧŧ o jahel o təmbəl

By wət o roswa bər səre bazar

Elm o pərhəng o daneşa məhrum

Təhtəe məşk ənt hilləh o azar

Doktor o daru gwaci ənt drvgyn

Hər gwəra nalənt bəzzəgyn bimar

Wənqy ke nam gept ent bəlvcani

Rah-əy nyma kəyt yəbbəra bit gar

Goşnəgyn mərdom cə şoda grywənt

Pər gəly kəndit mytəg-əy sərdar

A ke həmşam ent lapi halek ent

Porr ent cə pulla kissəge zərdar

Lagəryn həmmal-əy kəwəq ryş ent

Gvn təjuria wəşdel ənt tojjar

Dehkan ke janşvd ent wəti hydan

Cai məhsula kəŧŧ e kənt həŧŧar

Aher y təb'iz-əy dəwa ci ent

Kəndəgəyn mir o grywəgəyn pakar

Hemməty kən ke wəkte pəryad ent

Astigan lanc o həmbəlan şakar

Man jəwab dat ke cvn kənan bylan

Dər kəpəs şahin e nəkənt hənzar

Mən koja y karan e kəpan baryn

Rvc o şəp mesle hoştəra bigar

Şəp kədi əngət koŧŧetəg syahyn

Jonjory asmana nəjənt estar

Zolm o zolmata pvşetəg donya

Cyri cet ədl o hemmət o isar

Zvr-əy cəm kvr o gvş syəh copt ənt

Həkka pə asani nəkənt ekrar

Jəw təra dənt o pyş e kənt gəndim

Gvn zoban draji kənt təra bywar

Zolm o nadani petrət ent həlkəy

Petrət-əy sendəg baz e bit doşwar

Daema donya-əy rəwaj yş ent

Kəj rəwajyn cərk-əy gərdeş o rəptar

Həst ət yək səyyasy həbnək nam

Hoşter o əspi daştəgət besyar

Pərbehan kah o dani dat daem

Lagərynani hec nəkot timar

Yəkya jost kot y ce əsrary

Təw begwəş ce ent hekməte y kar

Cv jəwab datəg mərde səyyasa

Mən nəyan hvqi by mət o bysar

Lagər o lyŧan e kənan delgvş

Pərbeh o şərrynan kənan əngar

Ərsy pə habila nərycit kəs

Vştənt mən kabil-əy kəşa məkkar

Gvn kəya pəryad e kənan baryn

Heckəs-əy gvşan e nərəwt kukkar

Gellə cə dər  kəwman kənan pərcy

Məy wəti brat e nəşkonənt goptar

Mən nənalan cə dəste qənnigan

ŧəp məna man ent əz wəti kaŧar

Səng o şişə cə bondəra syad ənt

Prvştəg y sənga şişəhe abdar

As həmy dokkan-əy ceragəyg ent

Svtkəgi wahond-əy wəti əmbar

Sərbaz dən sərhədd o sərawana

Pəhrəg o pənnvc o geh o laşar

Hong o bəmpoşt dən hədde mennaba

Bent o bəşkərd o zergwər o cəhbar

Kol bəlvc yəkkyn lvg-əy pərzənd ənt

Gvn həmy yəkkyn jaməg o şəlwar

Nəyn ke ma yrani bəlvc təhna

Bəlkyn dən həbb o sybi o hozdar

Cakər o gwəhram-əy yəlyn possəg

Nəylənt mən lankbənd-əy boşa lygar

Cvn bəlvca y şat e bit pər wət

Nami bit dozz o rəhzən o əşrar

Rəhzəni sanqani gwəra əyb ent

Dozzi pə behdaryn bəlvcan ar

Behya ke pəŧŧit mat-əy pendvla

Kəşşit cə brat-əy kissəga kəldar

Dəsti pə syad-əy zəgrəgyn hvnan

Sohr ent dən srvşan rəstəryn hvnwar

Coqa mən diwana nəcəndynit

Gvn dəp-əy pəhran e nəbit tamdar

Daem mə rajani təha mvŧ ent

Manit dən həppoşta şəgan sərbar

Cv nəhent rəsm o dvd bəlvcani

Kəwmi mərdani karpəd o kerdar

Əždeha kvhan gvr e bvrynənt

Lvgi dəp cəŧŧ ənt kypok o keŧŧar

Kəy pəra namərda dela bəndit

Jənt wəti lvg-əy pərtəkan awar

Nəyn dəpa ləbz o nəyn həya cəmman

Nəyn dela rəhm o nəyn səra vpar

Zar pəma kəlp o kvŧekyn cokka

Kənt pet-əy paga sell o by pəlgar

Hər kəsy eslama bebit monker

Belli mən dəryaya kəpit gomsar

Rəh coşyn kəwm-əy gar o by gwah ent

Cvn e gişşit pelpel poŧ-əy giwar

Bəggi jəq suŧŧ o berr o by gwəmsyn

Dirsəryn pəndan e nəkəşşit bar

Bar həma jvgyn lyqəw e zirənt

Kar nəhent kwarrvkyn kəwaŧ-əy yar

Məy dəwa svck o sacəg o səbr ent

Baz bəra daga drah e bit bimmar

Bəlkena rvcy lyŧə kənt gərdun

Gvş e kənt rvc əz guşəhe kohsar

Dən həma hədda e bəren səbra

Bər bedənt wəşşyn kocəlyn qyqar

Kvh o kənqəg y rəhsəra baz ent

Cill 0 abderr o gryşəge por har

Poşte y kvhan qənn e kəyt prahyn

Teck e bit aher rahe nahəmwar

Təng o zyn tazi korrəgan kəjjit

Madənyn raha e cenənt rəhwar

Rvc nəbit cyre jəmbəran penhan

Şal modam həmnehr e nəbit gvn şar

Zolm e rəwt borza o pəda tərrit

Yrkəpy həst ent sərkəpa nacar

Hər wəkt ke nəwbət cəkk e jənt zvrəy

Torsit cə ləngyn mvryasyəhmar

Pvqy ke şanki dənt jənvzamy

Kədre yək bombe həstəi kənt kar

Dəh gəda bazara jənənt pəryad

Gong e bit jwaba tuppe atəşbar

Kəd kədi bit ke jəh bejənt estinn

žənd bekənt kvh o kucəgan sərgwar

Səndəg o byŧ o kəhcər o zydan

yək bəra həmdəsta beməllit har

Adrəwyn killəg məy pəda trəkkənt

Poll e bənt wəll o gəbb e bənt tyjar

Birr e bənt kəwrani konər səbzyn

Menj e bənt səwl o şah e jənt liwar

Təpt e rəwt wəşkəwşyn bəhar e kəyt

Bit jehan səbz o horrəm o golzar

Pər həma wəşşyn rvc-əy ommyda

Təwkəl pə rəbbe wahed 'olkəhhar

Həkk-əy awaz ent gwanke abdollah

Təw əgər wabynəg nəyəy gvş dar